Најмалку 150 луѓе загинаа во племенски судири во Судан

КАРТУМ (АА) - Најмалку 150 луѓе загинаа во последните два дена во племенски судири во југоисточен Судан, пренесува Агенција Анадолија (АА).

Десетици други се повредени во судирите што избувнаа меѓу племињата во средата и четвртокот во државата Синиот Нил, каде што насилството повторно се разгоре во јули.

„Обединетите нации се вознемирени од ескалацијата на насилствата во Лагава и повторното оживување на конфликтот во регионот на Синиот Нил“, објави на Твитер Мисијата на ОН за интегрирана транзиција во Судан (UNITAMS) .

„Одржливиот мир нема да биде можен без целосно функционална кредибилна влада која дава приоритет на потребите на локалните заедници, вклучително и безбедноста, и која се справува со основните причини за конфликтот“, се додава.

Судирите се најнови во бранот племенски насилства што ја зафатија целата земја, и покрај потпишувањето на Националниот мировен договор пред две години.

Судан е без функционална влада од октомври 2021 година, кога војската ја разреши преодната Влада на премиерот Абдала Хамдок и прогласи вонредна состојба, потег што политичките сили го оквалификуваа како „воен удар“.