Најмалку едно лице загина во напад со беспилотно летало во западна Украина

ИСТАНБУЛ (АА) - Најмалку едно лице загина, а четири се повредени во напад со беспилотно летало во западниот украински град Хмелницки, објави градоначалникот на градот Олександр Симчишин, пренесува Анадолу.

Тој на социјалната мрежа Телеграм објави и дека во нападот биле оштетени неколку згради.

„Овојпат непријателот употреби беспилотно летало. Во моментов има информации за еден загинат и четворица повредени“, рече тој.

„Пожарникарите и спасувачките екипи сè уште работат во областа“, додаде тој.

Претходно, во соопштението на Украинската војска е наведено дека Русија ја нападнала Украина од север со 14 беспилотни летала, тврдејќи дека 11 од нив биле уништени од системите за противвоздушна одбрана.

Русија на 24 февруари минатата година ја започна „специјалната воена операција“ во Украина.

Досега во конфликтот, кој сега е во својата втора година, загинаа повеќе од 8.000 цивили, а речиси 13.300 се ранети, покажуваат најновите податоци на Обединетите нации (ОН).