Околу 280.000 муслимани ја одбележаа Лејлету-л-кадр во џамијата „Ал Акса“

КУДС (АА) - Околу 280.000 муслимани во Палестина дојдоа во окупираниот Источен Кудс (Ерусалим) за во џамијата „Ал Акса“ да ја одбележат Лејлету-л-кадр ​​​​​​​, најизбраната ноќ во годината што, според исламското учење, е повредна од илјада месеци, пренесува Анадолу.

Повикувајќи се на податоци од Исламската управа за вакуфи во Ал-Кудс, палестинската новинска агенција ВАФА објави дека, и покрај пречките на Израел, околу 280.000 муслимани дошле да се молат во џамијата „Ал Акса“.

И покрај препреките на израелските сили, Палестинците и муслиманите од другите земји имаа ифтар во дворот на „Ал Акса“.

За муслиманите, „Ал Акса“ претставува трето најважно светилиште, а Евреите тврдат дека порано на тоа место имало два еврејски храма.

Комплексот „Ал Акса“, кој зафаќа 15 отсто од областа на старото јадро на Кудс, е под израелска окупација и претставува точка на средба на трите најголеми религии во светот.

Израел го окупираше Источен Кудс, каде што се наоѓа „Ал Акса“, за време на Арапско-израелската војна во 1967 година. Израел го анектираше целиот град во 1980 година, чин што никогаш не беше признат од меѓународната заедница.