Преживеан од авионската несреќа на „Азербејџан ерлајнс“ тврди дека се случила експлозија при третиот обид за слетување

МОСКВА (АА) - Преживеано лице од несреќата на „Азербејџан ерлајнс“ вчера изјави дека пилотите на авионот трипати се обидувале да го спуштат авионот во Грозни, Чеченија, по што следувала експлозија надвор од авионот, според аудиоснимката споделена од рускиот телевизиски канал РТ, јавува Анадолу.

Субханкул Рахимов рече дека нешто експлодирало при третиот обид за слетување и дека кога посегнал по елекот за спасување на него нашол дупка предизвикана од шрапнел.

Тој кажа дека по експлозијата бил погоден од шрапнел.

Рахимов раскажа за повеќекратните обиди за слетување, велејќи: „Авионот требаше да слета, а потоа нагло почна да се крева во висина. Во тој момент се разбудив и сфатив дека авионот не можеше да слета при првиот обид. Потоа се издигна над облаците. Долу имаше магла, густа магла. Авионот се сврти и вторпат се обиде да слета.“

Тој додаде: „Како што избројав, имаше два обида. Третиот пат нешто експлодира. Се случи експлозија.“

Запрашан дали експлозијата настанала во авионот, Рахимов рече дека се случила надвор и откорнала дел од покривот на авионот.

„Експертите, специјалистите ќе дадат своја процена, но се случи експлозија. Сигурно имаше експлозија. Сите ја слушнаа. Посегнав по елекот за спасување, си помислив - никогаш не знаеш каде ќе слетаме. Подобро да го облечам елекот за спасување. Го зедов, видов - дупка на јакната, предизвикана од шрапнел“, рече тој.

Тој рече дека по експлозијата шрапнел му прелетал покрај нозете и поминал низ елекот за спасување, а дека и го фотографирал тоа.

„Специјалисти треба да го решат тоа, да донесат заклучоци, да одлучат што се случило“, рече тој.

Девојката на Заур Мамадов, пратила СМС-порака од времето на несреќата до рускиот медиум „Радовка“.

Заур бил пренесен во болница со повреди со непозната тежина. Во моментов се решава како да биде пренесен во Русија.

„Заур е цел во модринки, но е свесен“, изјави неговата девојка.

Авионот на „Азербејџан ерлајнс“ со 67 луѓе, кој леташе на релација Баку-Грозни, се урна во близина на казахстанскиот касписки град Актау.

Во авионската несреќа животот го загубија 38 лица, а 29 се преживеани, соопштија казахстанските власти.

Денешниот ден е прогласен за ден на национална жалост во Азербејџан.