Протести низ Јемен поради американските воздушни напади врз земјата

САНА (АА) - Во Сана, главниот град на Јемен, како и во неколку други градови се одржаа протести поради американските воздушни напади врз земјата, јавува Анадолу.

Според извештаите, нападите биле наредени од американскиот претседател Доналд Трамп.

Демонстрантите се собраа на плоштадот Ал-Сабин во Сана, осудувајќи ги американските воздушни напади, јавува телевизијата Ал-Масира, поврзана со Хусите.

Демонстрантите ги осудија наредбата на Трамп и американската политика, истовремено изразувајќи поддршка за Газа, која и понатаму е под израелски воздушни напади.

Слични протести беа одржани и во други градови, меѓу кои Лахиџ, Дали, Худаида, Амран, Сада, Таиз, Хаџа, Ал-Џауф, Рајма, Мариб и Ал-Бајда. Демонстрантите ги осудија американските напади и акциите на Израел во Газа.

Според извештаите, протестите биле организирани по повикот на лидерот на Хусите, Абдул-Малик ал-Хути.

Нападите на Хусите врз американски и израелски бродови ескалираа во јануари 2024 година, во знак на „солидарност со Газа“.

Откако Израел го прекрши примирјето во Газа и затвори премини на почетокот на март, блокирајќи ја хуманитарната помош за време на Рамазан, Хусите ги обновија нападите врз израелските бродови како притисок врз Тел Авив.

Во саботата, американскиот претседател Доналд Трамп нареди „голем напад“ врз Хусите во Јемен како одговор на нивните акции.