Расте бројот на луѓе со мигрантско потекло во Германија

БЕРЛИН (АА) - Бројот на лица со мигрантско потекло во Германија лани се зголеми за 2 отсто во споредба со претходната година и достигна 22,3 милиони, пренесува Агенција Анадолија (АА).

Германската Федерална статистичка служба (Destatis) соопшти дека од 2021 година, 22,3 милиони луѓе, што е еквивалентно на 27,2 отсто од населението, имаат имигрантско потекло.

Во 2020 година оваа бројка е евидентирана како 21,9 милиони.

Бројот на луѓе со мигрантско потекло во Германија минатата година се зголеми за 2 отсто во споредба со 2020 година. Една четвртина од населението има имигрантско потекло.

Зборовите „имигрантско потекло“ во земјата се користат за да се опишат оние кои не се родени Германци или поединците на кои еден од родителите не е роден Германец.

Од населението со мигрантско потекло, во 2021 година 53 отсто (приближно 11,8 милиони) имаат германско државјанство, додека 47 отсто имаат странско државјанство.

62 отсто (13,9 милиони) од имигрантите потекнуваат од европска земја, додека 7,5 милиони од овие имигранти со европско потекло се од земјите членки на Европската Унија.

Од сите имигранти, 5,1 милион се Азијци, 3,5 милиони од земјите од Блискиот Исток и 1,1 милион од африканските земји.

Федералната статистичка служба (Destatis) соопшти дека околу 700.000 имигранти дошле од земјите од Северна, Централна или Јужна Америка и Австралија.

- Турција е на прво место -

На листата на земји од каде што доаѓаат имигрантите Турција е на прво место со 12 отсто, а Полска е втора со 10 отсто.

По Полска следуваат Русија и Казахстан со 6 отсто и Сирија со 5 отсто.

Забележително е и тоа што 1 процент од луѓето со мигрантско потекло што живеат во Германија во 2021 година, односно 308.000, се Украинци. Огромното мнозинство (82 проценти) од нив се самоимигрирани.

Статистичката служба исто така соопшти дека поради неодамнешната бегалска миграција, бројот на лица со украинско имигрантско потекло во Германија значително ќе се зголеми во иднина.

Меѓу другото, се нагласува дека приближно една третина (7,2 милиони) од имигрантите зборуваат само германски дома, а најзборувани јазици освен германскиот се турскиот со 8 отсто, рускиот со 7 отсто и арапскиот со 5 отсто.

Во Германија, најнаселената членка на Европската Унија (ЕУ), бројот на населението минатата година остана на 83,2 милиони, бројка што е забележана на крајот на 2019 и 2020 година кога беше во ек епидемијата на коронавирусот (Ковид-19).