Русија: Приемот во НАТО нема да ја зајакне безбедноста на Финска и Шведска

МОСКВА (АА) - Рускиот заменик-министер за надворешни работи изјави дека Финска и Шведска нема да ја зголемат својата безбедност со приклучувањето кон НАТО.

„Напротив, општото ниво на тензии во Европа ќе се зголеми“, изјави за новинарите во Москва, Сергеј Рјабков.

„Тие не треба да имаат никакви илузии дека само ние ќе го трпиме ова... во Брисел, во Вашингтон и во други главни градови на НАТО... целокупното ниво на воена тензија ќе се зголеми и ќе има помала предвидливост во оваа област“, рече Рјабков.

Запрашан за можните чекори што Русија може да ги преземе како одговор, дипломатот рече дека потезите ќе зависат од „практичниот исход“ на приклучувањето на Финска и Шведска кон воениот сојуз.

„Ова е уште една тешка грешка со далекусежни последици. Но што да се прави, такво е нивото на оние кои прават политички одлуки во сопствените земји денес“, рече тој.

Лидерите на Финска и Шведска ја потврдија нивната намера да се приклучат кон НАТО, напуштајќи го децениското воено неврзување. Членството треба да биде одобрено од сите 30 членки на Алијансата.

Во обраќањето на министрите за надворешни работи на НАТО во неделата, шефот на НАТО, Јенс Столтенберг, рече дека Финска и Шведска се најблиските партнери на НАТО и ако тие одлучат да аплицираат за членство, тоа би било „историско“.

„Нивното членство во НАТО ќе ја зголеми нашата заедничка безбедност, покажувајќи дека вратата на НАТО е отворена и дека агресијата не е исплатлива“, рече Столтенберг, повторувајќи дека сите суверени нации имаат право сами да го изберат својот пат.