Русија тврди дека спречила пар американски стратешки бомбардери да ја преминат границата

ИСТАНБУЛ (АА) - Русија денес соопшти дека спречила пар американски стратешки бомбардери да ја преминат нејзината граница, пренесува Анадолу.

Во соопштението на руското Министерство за одбрана се вели дека руската „контрола на воздушниот простор“ открила група воздушни цели над Баренцовото Море додека се приближувале до границата.

Во соопштението се наведува дека руски борбени авиони биле испратени за да ги идентификуваат целите, за кои се вели дека биле идентификувани како пар стратешки бомбардери Б-52Х на Американските воздухопловни сили.

Понатаму се наведува дека стратешките бомбардери го прилагодиле курсот на летање откако руските борбени авиони им се приближиле, додавајќи дека немало никакво нарушување на руската граница.

„Летот на руските ловци беше извршен во строга согласност со меѓународните правила за користење на воздушниот простор над неутрални води и во согласност со безбедносните мерки“, се додава.

Од американските власти сѐ уште нема коментар за тврдењата на Русија.