АНКАРА (АА) - Воената соработка со Северна Кореја се проширува, изјави рускиот министер за одбрана, Андреј Белоусов, кој денес во Пјонгјанг се сретна со својот севернокорејски колега Но Кванг Чол, пренесува Анадолу.

„Со нетрпение очекуваме блиска и плодна соработка со нашите корејски другари“, објави руската новинска агенција ТАСС цитирајќи ја изјавата на Белоусов.

Москва е „посветена на имплементирање“ на сите договори постигнати со Пјонгјанг, додаде тој.

Шефот на руската одбрана пристигна во Пјонгјанг по неодамнешната посета на севернокорејската министерка за надворешни работи Чое Сон-хуи на Москва, каде што оствари средба со Белоусов и со претседателот Владимир Путин.

За време на нејзината посета, Чое вети дека Пјонгјанг „моќно ќе ја поддржува и помага руската армија“ до нејзината победа во Украина.

Посетата на Белоусов на Пјонгјанг доаѓа во време на тврдењата на САД, Јужна Кореја и Украина дека Северна Кореја испратила илјадници војници во Русија за да ѝ помогнат на Москва во нејзината борба против Украина.

Но, ниту Пјонгјанг ниту Москва не ги потврдија, ниту негираа тврдењата.

Во јуни, Пјонгјанг и Москва потпишаа сеопфатен договор за стратешко партнерство со кој се бара да си пружат воена помош едни на други во случај на агресија од трета страна.

Минатата недела, јужнокорејската разузнавачка агенција тврдеше дека Северна Кореја ѝ доставила на Русија дополнителни самоодни хаубици и ракетни фрлачи.