САД: Зголемената соработка на Русија и Иран голема закана по лансирањето на сателитот

ВАШИНГТОН (АА) - Зголемената соработка на Русија и Иран треба да се смета за голема опасност за меѓународната заедница, соопшти Стејт департментот откако Москва испрати ирански сателит во орбитата.

Портпаролот на Стејт департментот за Агенција Анадолија изјави дека САД се свесни за лансирањето од страна на Русија на „сателит со значителни шпионски способности во име на Иран“.

„Продлабочувањето на сојузот со Иран од страна на Русија е нешто на што целиот свет треба да обрне внимание и да го гледа како голема закана“, истакна портпаролот во размената на мејлови.

Лансирањето се случи само три недели откако рускиот претседател Владимир Путин и иранскиот врховен лидер ајатолах Али Хаменеи ветија дека ќе работат заедно против Западот.

„Сателитот „Кајам“, именуван по персискиот поет и филозоф од 11 век, Омар Кајам, беше лансиран од руската ракета „Сојуз“ од вселенската станица „Бајконур“ во Казахстан“, соопшти руската вселенска агенција.

Шефот на „Рускосмос“, Јури Борисов, го поздрави лансирањето како „значен настан во билатералната соработка помеѓу Русија и Иран што го отвора патот за нови заеднички проекти“.

Во меѓувреме, Иран ги доби првите податоци од својот сателит „Кајам“, според иранската новинска агенција ИРНА. „Податоците вклучуваат телеметриски мерења добиени од станиците на земјата на иранската вселенска агенција“, соопшти ИРНА.