Şerife Çetin
09 Декември 2023•Ажурирај: 10 Декември 2023
ЊУЈОРК (АА) - Соединетите Американски Држави (САД) ставија вето на нацрт-резолуцијата во Советот за безбедност на Обединетите нации (СБОН) со која се бара итен хуманитарен прекин на огнот во Газа, јавува Анадолу.
Советот за безбедност на ОН на итна седница гласаше за нацрт-резолуцијата претставена од Обединетите Арапски Емирати (ОАЕ).
САД како постојана членка стави вето на нацрт-резолуцијата, Велика Британија беше воздржана, а останатите 13 членки гласаа „за“.
Во нацрт-резолуцијата се наведува дека е потребно да се заштитат сите цивили, укажувајќи на ужасната хуманитарна ситуација во Појасот Газа и страдањето на палестинскиот народ.
Исто така, во нацрт-резолуцијата, која повикува на итен хуманитарен прекин на огнот, сите страни се повикани да ги исполнат своите обврски според меѓународното право, особено во поглед на заштита на цивилите.
Нацрт-резолуцијата бара итно и безусловно ослободување на сите заробеници и пристап на хуманитарната помош.
Постојаниот претставник на САД во ОН, Роберт Вуд, изјави дека Хамас не е осуден во нацрт-резолуцијата и дека е неприфатливо некои членки на Советот за безбедност да молчат по ова прашање.
Во Советот за безбедност на ОН по 7 октомври се одржаа многу седници, на многу нацрт-резолуции беше ставено вето, додека на 15 ноември беше усвоена резолуцијата број 2712 со која се бараше хуманитарна пауза во судирот во Појасот Газа.
