Северна Македонија домаќин на состанокот на лидерите на ЕУ и Западен Балкан во понеделник и вторник

СКОПЈЕ (АА) - Еврокомесарката за проширување Марта Кос ќе се сретне со лидерите на земјите од Западниот Балкан в понеделник и вторник во Скопје, со цел забрзување на напорите за спроведувањето на Планот на ЕУ за раст за регионот, известува Анадолу.

Европската комисија објави дека на средбата со еврокомесарката Кос во Скопје ќе се присуствуваат премиерот на Северна Македонија, Христијан Мицкоски, и лидерите на Албанија, Босна и Херцеговина, Косово, Србија и Црна Гора.

Во соопштението се истакнува дека Планот за раст за Западниот Балкан нуди придобивки за шесте земји кои се подготвуваат за членство во ЕУ. На состанокот се очекува да биде разгледан напредокот и да се дискутира за чекорите што треба да се преземат за негово спроведување.

Комесарката Кос ќе работи со лидери за претворање на обврските во акција, при што ќе се фокусираат на критичните реформи за ослободување на средствата во рамките на Планот за раст и за обезбедување видливи придобивки за граѓаните на земјите кандидати уште пред зачленувањето (во ЕУ).

Како дел од дискусиите ќе стане збор и за инвестициски пакет од 87,7 милиони евра во рамките на постојната Инвестициска рамка за Западен Балкан (ВБИФ). Се очекува овој пакет да привлече речиси половина милијарда евра приватни инвестиции во проекти за чиста енергија низ целиот регион.

Планот за раст на Западниот Балкан, кој го промовираше Европската комисија во октомври 2023 година, има за цел да го поттикне економскиот раст на регионот и да им помогне на западнобалканските земји да се приклучат кон ЕУ.

Со овој план се предвидуваат средства од шест милијарди евра за финансирање на реформи и инвестиции во различни области, како што се енергетика, транспорт и дигитална трансформација. Со овие средства, кои ќе се исплаќаат во форма на грантови и позајмици под поволни услови, се планира зголемување на просперитетот и стабилноста на регионот на Западниот Балкан.