СЗО: 604 загинати и 5.127 повредени досега во судирите во Судан

ЖЕНЕВА (АА) - Над 600 луѓе загинаа во неколкунеделниот вооружен конфликт во главниот град на Судан, Картум, соопшти денес Светската здравствена организација (СЗО), јавува Анадолу.

Тарик Јашаревиќ, портпаролот на СЗО, ги објави новите бројки на брифинг во Обединетите нации - 604 загинати и 5.127 повредени од почетокот на немирите во Судан на 14 април.

„Сега има повеќе од 700.000 внатрешно раселени лица во Судан“, рече Јашаревиќ, што е двојно повеќе од 340.000 од пред само една недела.

На 15 април избувнаа борби меѓу суданската Армија и паравоените Сили за брза поддршка (РСФ) во Картум и неговата околина.

Во последните месеци меѓу суданската Армија и паравоените сили (РСФ) се појави несогласување околу интеграцијата на РСФ во вооружените сили, клучен услов за транзицискиот договор на Судан со политичките групи.

Судан е без функционална влада од октомври 2021 година, кога војската ја разреши преодната Влада на премиерот Абдала Хамдок и прогласи вонредна состојба, потег што политичките сили го квалификуваа како „државен удар“.

Преодниот период на Судан, што започна во август 2019 година по соборувањето на претседателот Омар ал-Башир, требаше да заврши со избори на почетокот на 2024 година.