Сингапур, азискиот Гибралтар, го посетуваат голем број туристи од целиот свет

СИНГАПУР (АА) - Сингапур, островскиот град држава во југоисточна Азија, на јужниот дел на Малајскиот Полуостров, е една од најпопуларните дестинации за која се одлучуваат голем број туристи од целиот свет, пренесува Anadolu Agency (AA).

Поради неговата стратешки важна позиција го нарекуваат и „азиски Гибралтар“.

Се наоѓа на крајниот југ на Малајскиот Полуостров на влезот во Малајскиот Премин (морски премин меѓу Малајскиот Полуостров и Суматра). Тоа е најважен морски премин кој ги спојува Тихиот и Индискиот Океан и преку него поминуваат повеќето бродови кои пловат меѓу источна и јужна Азија. Повеќето од тие бродови застануваат во Сингапур, па тој се разви во значајно пристаниште.

Четвртина од островот ја прекрива шума од која поголемиот дел е заштитен како посебен резерват. Меѓу автохтоните животни се наоѓаат и мајмуните макаки ракојади.