Словенија: „Вакцинацијата на населението против мајмунски сипаници не е ниту потребна ниту е препорачлива“

ЉУБЉАНА (АА) - Врз основа на расположливите податоци и проценетите ризици и придобивки, Националниот институт за јавно здравје (НИЈЗ) на Словенија оценува дека вакцинацијата на општата популација против мајмунски сипаници во моментов не е ниту потребна ниту е препорачлива, известува Анадолу.

НИЈЗ информираше дека во Словенија против оваа болест е достапна вакцината „jynneos“ за возрасни.

Вакцинацијата против мајмунски сипаници или „mpox“ ја вршат клиниките во подрачните единици на НИЈЗ во Љубљана, Марибор и Целје, како и Центарот за вакцинација на Универзитетскиот клинички центар (УКЦ) Љубљана.

Вакцинацијата се спроведува со две дози од вакцината, а препорачаниот интервал помеѓу дозите е 28 дена. За вакцинација по изложување на вирусот доволна е една доза, информираат од НИЈЗ. Има смисла да се направи тоа што е можно поскоро, по можност во рок од четири дена (до максимум 14 дена) по изложувањето.

Се препорачува за луѓе кои биле во близок контакт со заболен, особено доколку постои поголем ризик од компликации (луѓе со ослабен имунолошки систем, трудници). Исто така, се препорачува и за мажи кои имаат секс со мажи и биле во близок контакт со заболен. Истото тоа важи и за медицинските или лабораториските работници изложени на вирусот на мајмунски сипаници во случај на несоодветна заштитна опрема или незгода.

Инаку, вакцинацијата се препорачува за лабораториски работници и многу изложени здравствени работници, на пример вработени во клиниките за полово преносливи болести. Исто така, се препорачува и за хуманитарните работници кои ќе работат во погодените области и за сите кои се изложени на зголемен ризик од изложеност на вирусот на мајмунски сипаници.

Поради појава на нова варијанта на мајмунски сипаници во Африка, Светската здравствена организација (СЗО) на 14 август прогласи јавно здравствена криза од глобални размери. Во вторникот СЗО предупреди дека појавата на сипаници не е новиот Ковид.

Инфекцијата се пренесува со контакт или телесни течности на заболеното лице, преку капки (од кивање или кашлање) при подолг близок контакт со заразено лице, како и при контакт со заразени предмети. Вирусот може да се пренесе и при контакт со заразено животно, најчесто преку глодари или примати, објаснуваат од НИЈЗ.

Клиничкиот тек на „mpox“ вирусот е обично благ. Симптоми на болеста се треска, главоболка, болки во мускулите, отечени лимфни јазли, треска и исцрпеност. Обично се развива и осип. Ова често започнува на лицето, а потоа се шири на другите делови од телото, вклучувајќи ги и гениталиите.

Повеќето од пациентите закрепнуваат за неколку недели. Ризикот од потежок тек на болеста е поголем кај малите деца, трудниците и лицата со ослабен имунитет.