Büşra Nur Bilgiç Çakmak
11 Мај 2020•Ажурирај: 12 Мај 2020
РИМ (АА) - Спасената италијанска хуманитарка, Силвија Констанца Романо, која го прифати исламот, рече дека го сторила тоа по сопствена волја и дека не била принудена на тоа, пренесува Агенција Анадолија (АА).
Романо (25) беше киднапирана од кенискиот крајбрежен град Чакама, на југоистокот од земјата, во ноември 2018 година.
Таа беше спасена вчера преку заеднички напори на турските, сомалиските и италијанските разузнавачки служби.
„Тие ми ветија дека нема да бидам убиена и така и беше“, изјави Романо за италијанската новинска агенција АНСА.
Во врска со нејзиното прифаќање на исламот, Силвија истакна дека тоа се случило некаде во средината на периодот на нејзиното заробеништво.
„Беше спонтано, а не принудно. Во тие месеци ми дадоа Куран и благодарение на моите киднапери научив и малку арапски јазик“, рече таа. „Тие ми ги објаснија нивните причини и нивната култура. Мојот процес на прифаќање на исламот беше бавен. Немаше брак, ниту некоја врска, само почит.“
Заменик-министерот за надворешни работи на Италија искажа благодарност за турската соработка за време на операцијата за спасување.
„Имавме соработка со Турската разузнавачка служба за нејзино лоцирање и преземање на акцијата во вистинско време“, изјави Марина Серени за телевизискиот канал LA7.
