Спектакуларно отворање на Олимписките игри во Париз се одржа на реката Сена

ПАРИЗ (АА) – Летните олимписки игри во Париз 2024 синоќа официјално започнаа со спектакуларно отворање што се одржа на реката Сена, известува Анадолу.

Франција го воодушеви светот со екстравагантната церемонија на отворање на Олимписките игри во срцето на Париз, а околу 45.000 полицајци, 10.000 војници и 2.000 членови на приватно обезбедување ја обезбедуваа парадата долж реката Сена, нејзините брегови и околните културно-историски споменици.

Претставени беа сите национални тимови кои донесоа вкупно 10.500 спортисти на Олимпијадата, на која Северна Македонија учествува со 6 спортисти. Туркије по Париз ќе ја претставуваат 101 спортист.

Меѓу големиот број високи функционери на церемонијата беа францускиот претседател Емануел Макрон, генералниот секретар на Обединетите нации Антонио Гутереш и претседателот на Меѓународниот олимписки комитет Томас Бах, кои со пригодни говори ги прогласија Олимписките игри за отворени.

- Свеченото отворање за прв пат се одржа надвор од стадионот

Спектакуларната церемонија на отворање на Олимписките игри во Париз е првата ваква церемонија во историјата на игрите што се одржала на отворено, надвор од стадионот.

Уметнички директор на церемонијата беше францускиот режисер и актер Томас Жоли.

Вкупно 85 бродови со спортисти од 204 земји и олимписки тим на мигранти тргнаа под мостот Аустерлиц и пловеа по реката Сена повеќе од шест километри до мостот кај Ајфеловата кула.

За време на церемонијата, бродови поминаа низ водечките историски и туристички локалитети во Париз, катедралата Нотр Дам, градското собрание на Париз, музејот Лувр, градината Туилери, Велика палата и Ајфеловата кула.

Церемонијата не ја расипа дождот, а се проценува дека на спектаклот присуствувале 300.000 луѓе. Фокусот на церемонијата беше промоција на историското и културното богатство на Франција, како и мирот, толеранцијата и еднаквоста како универзални пораки на спортот и олимпизмот.

Повеќечасовниот спектакл заврши со подигање на олимпиското знаме и палење на олимпискиот оган.