Специјалните сили влегоа во домот на поранешниот претседател на Киргистан

БИШКЕК (АА) - Специјалните сили денес влегоа во куќата на поранешниот претседател на Киргистан, Алмазбек Атамбајев, за да го уапсат, пренесува Anadolu Agency (AA).

Државниот комитет за национална безбедност на Киргистан соопшти дека полицијата упаднала во домот на Атамбајев, кој се наоѓа во селото Кои-Таш, 12 км од главниот град Бишкек.

Атамбајев, чиј имунитет беше одземен, одбива да ја почитува судската покана во кривичната истрага.

За време на специјалната операција, полицијата отворила оган кон приврзаниците на Атамбајев кои стоеле во дворот на куќата, се додава во соопштението.

Специјалните сили користеле само гумени куршуми.

Некои од поддржувачите на поранешниот претседател се повредени.

И покрај тоа што е релативно стабилен, Киргистан доживеа периоди на неизвесност откога доби независност од Советскиот Сојуз.

Во 2005 и 2010 година, тогашните претседатели беа тргнати од функција во насилни протести кои оставија стотици мртви.

Мнозинството од популацијата на Киргистан, која изнесува шест милиони, се муслимани кои зборуваат туркиски јазик, а северниот и јужниот дел на земјата се поделени според богатството и етничката припадност.