Тимот на МААЕ во украинската нуклеарна централа Запорожје слушнал експлозии по напад на помошен објект

ИСТАНБУЛ (АА) - Тимот на Меѓународната агенција за атомска енергија (МААЕ) во украинската нуклеарна централа Запорожје слушнал експлозии и забележал чад што доаѓал од блиска локација, објави нуклеарното надзорно тело на Обединетите нации, пренесува Анадолу.

„Тимот на МААЕ во украинската нуклеарна централа Запорожје слушнал експлозии и видел чад што доаѓал од блиска локација каде што централата соопшти дека еден од нејзините помошни објекти е нападнат денес (сабота)“, се вели во соопштението на МААЕ, цитирајќи го шефот Рафаел Гроси.

Тимот бил информиран од претставници на нуклеарната централа дека објектот, кој се наоѓа на 1.200 метри од периметарот на централата, бил погоден во гранатирање и напади со беспилотни летала почнувајќи од 9 часот наутро по локално време што се совпаѓа со времето кога тимот слушнал воена активност во близина, се вели во соопштението.

Чадот од областа сè уште бил видлив и во попладневните часови, се наведува во соопштението.

Инцидентот е најновиот во низата настани во последните недели и месеци што ги посочуваат ризиците за нуклеарната безбедност, се посочува во соопштението.

„Секој напад во близина на нуклеарна централа - без оглед на целта - претставува потенцијален ризик и за нуклеарната безбедност и мора да се избегнува.“

„Уште еднаш, повикувам на максимална воена воздржаност во близина на нуклеарните постројки со цел да се спречи континуираниот ризик од нуклеарна несреќа“, порача Гроси во соопштението.