Трамп ја нарече „апсолутна неопходност“ американската контрола над Гренланд

АНКАРА (АА) - Новоизбраниот американски претседател Доналд Трамп денес повторно ја разгори дебатата за Гренланд, нарекувајќи ги сопственоста и контролата над автономната данска територија „апсолутна неопходност“ за Соединетите Американски Држави (САД), пренесува Анадолу.

Трамп го повтори својот став на својата мрежа на социјални медиуми „Truth Social“, во најавата на Кен Хаури, коосновачот на PayPal, за негов избор за американски амбасадор во Данска.

„За целите на националната безбедност и слободата низ целиот свет, Соединетите Американски Држави чувствуваат дека сопственоста и контролата над Гренланд се апсолутна неопходност. Кен ќе направи прекрасна работа во претставувањето на интересите на Соединетите Американски Држави“, напиша Трамп.

И покрај стекнувањето автономија од Данска во 1979 година, Гренланд остана зависен од Копенхаген за надворешните работи, безбедноста и финансиските прашања. Територијата е позната по огромни резерви на ураниум, злато, нафта и гас.

Во 1946 година поранешниот американски претседател Хари Труман ѝ понуди на Данска 100 милиони долари во злато за купување на Гренланд.

Во 2019 година тогашниот претседател Трамп изрази интерес за купување на островот, потег што доведе до краток дипломатски јаз меѓу Вашингтон и Копенхаген. Тензиите го натераа Трамп да ја откаже планираната државна посета на Данска.