Фон дер Лајен повика на воздржаност и предупреди на ескалација во трговскиот конфликт со САД

ИСТАНБУЛ (АА) - Претседателката на Европската комисија, Урсула фон дер Лајен, во телефонскиот разговор со кинескиот премиер Ли Кијанг, повика на воздржаност и предупреди на можноста од натамошна ескалација на трговските тензии предизвикани од американските царини, јавува Анадолу.

„Претседателката повика на преговарачко решение на актуелната ситуација, нагласувајќи ја потребата да се избегне дополнително заострување“, соопшти Европската комисија.

Фон дер Лајен ја нагласи одговорноста на Кина и Европа во поддршката на „силен и реформиран трговски систем кој е слободен, правичен и базиран на еднакви услови за сите“.

Во разговорот со Ли Кијанг, таа укажала на „критичната улога“ на Кина во справувањето со можните последици од пренасочувањето на трговијата како резултат на новите царини.

Двајцата соговорници разговарале за воспоставување механизам за следење на евентуално пренасочување на трговијата и за навремено реагирање на таквите случувања.

„Таа, исто така, потсети на итноста за структурни решенија за ребаланс на билатералните трговски односи и обезбедување подобар пристап за европските бизниси, производи и услуги на кинескиот пазар“, се вели во соопштението.

Шефицата на Европската комисија повторно ја нагласи потребата од „праведен и траен мир“ во Украина, нагласувајќи дека условите за мир мора да ги утврди Киев.

„Таа ја повика Кина да ги засили своите напори и значајно да придонесе кон мировниот процес“, се додава во соопштението.

Минатата недела, американскиот претседател Доналд Трамп најави дополнителни царини од 34 отсто за увозот од Кина, врз веќе постоечките 20 отсто како дел од неговата политика на „реципроцитет“. Тој исто така се закани и со нови 50 отсто царини доколку Пекинг не ги повлече своите контрамерки.

Што се однесува до ЕУ, Трамп веќе воведе царина од 20 отсто за увоз на европски производи.