Франција ја забрани кампањата на Советот на Европа против говорот на омраза кон муслиманите

ПАРИЗ (АА) - Франција ја забрани кампањата иницирана од Советот на Европа против говорот на омраза кон муслиманите, јавува Агенција Анадолија (АА).

Говорејќи за телевизијата ЛСИ ТВ, Сара ел Хери, француската министерка за млади, рече дека кампањата на Одделот за инклузија и борба против дискриминацијата на Советот ја шокирала.

„Кампањата е против вредностите на Франција“, тврди Ел Хери.

„Носењето марама е охрабрено во видеото на кампањата. Го осудуваме ова. Франција не ја одобрува оваа кампања [на Советот на Европа] и кампањата е откажана.“

„Тие го бранеа секуларизмот и верските слободи, но оваа кампања ја брани марамата“, додаде таа.

Откако Франција обезбеди откажување на кампањата, Советот на Европа ги избриша поврзаните објави на профилот на Твитер од својата кампања.

„Европската комисија обезбеди средства за кампањата како дел од програмата за закон, еднаквост и државјанство“, пишува весникот „Фигаро“ (Le Figaro).

Советот на Европа во четвртокот ја започна кампањата против дискриминацијата на жените кои носат марами.

На профилот на Твитер на Одделот за инклузија и антидискриминација беа објавени фотографии на жени со марами, со пароли „Слободата е во марамата“, „Донеси радост и прифати хиџаб“ и „Убавината е во различноста како што е слободата во хиџабот“.