Членови на муслиманската американска заедница во знак на протест одржаа ифтар пред Белата куќа

ВАШИНГТОН (АА) - Американскиот претседател Џо Бајден синоќа се очекуваше да организира ифтар во Белата куќа за членовите на муслиманската заедница, јавува Анадолу.

Наместо тоа, десетици членови на муслиманската американска заедница и нивни сојузници, и покрај дождот, ветрот и ниските температури, во знак на протест ифтарот го организираа пред зградата на извршната власт, барајќи од претседателот да повика на итен траен прекин на огнот за да се запре крвопролевањето во опколениот Појас Газа.

„Белата куќа не можеше да биде домаќин на муслиманската заедница, бидејќи ние одбивме да одиме. И мислам дека во знак на солидарност, сакавме да излеземе пред Белата куќа и да ги потсетиме што сакаме“, изјави за Анадолу, Роберт Мекоу, директор за владини работи во групата за застапување на Советот за американско-исламски односи (CAIR).

„Тие знаат што сакаме ние. Сакаме прекин на огнот сега. Траен прекин на огнот. Сакаме крај на сите американски трансфери на оружје во Израел и сакаме слободен проток на хуманитарна помош“, додаде тој.

Карин Жан-Пјер, портпаролката на Белата куќа, рече дека претседателот ќе одржи ифтар за муслиманските претставници во неговата администрација по завршувањето на средбата со муслиманските лидери.

Не е јасно колку, доколку ги има, водачи на заедницата избраа да учествуваат на состанокот на „работната група“, кој не беше вклучен во јавниот распоред што циркулираше со новинарите од Белата куќа.

Говорејќи за Анадолу надвор од Белата куќа, Мохамад Хабе, непрофитен директор за информирање на заедницата на американските муслимани за Палестина, рече дека помалку од 15 водачи на муслиманската заедница добиле покани за официјалниот настан во Белата куќа, а оној што отишол ја искористил можноста да предаде протестно писмо против Бајден.

„Повеќе од срамно е што претседателот повеќе би сакал да прави евтини трикови отколку да одговори на повикот на нашата заедница и да им ја даде на палестинските животи почитта што ја заслужуваат“, рече тој.

Израел започна смртоносна воена офанзива врз Појасот Газа со неселективно бомбардирање на цивилни населби, училишта, верски објекти и болници по нападот на палестинската група Хамас на 7 октомври, во кој Тел Авив вели дека се убиени речиси 1.200 Израелци, но според зборовите на пилот на Израелските вооружени сили, можно е дел од загинатите Израелци да се жртва на примената на „Ханибаловиот протокол“ од страна на израелската војска.

„Ханибалова директива“ или „Ханибалов протокол“ е контроверзна процедура што ја користат израелските одбранбени сили (ИДФ), со цел да се спречи киднапирање на израелските војници од страна на непријателските сили. Според оваа директива, „киднапирањето мора да се запре со сите средства, дури и по цена на напад и елиминирање на киднапираните“. Овој протокол од страна на Израел е воведен во 1986 година.

Во израелските напади во Појасот Газа досега се убиени најмалку 32.916 Палестинци, а над 75.000 се повредени во услови на масовно уништување и недостаток на неопходни средства за опстанок.

Израел воведе целосна блокада на Појасот Газа, оставајќи го неговото население, особено жителите на северна Газа, на работ на гладување. Тоа драматично ја зголеми потребата за меѓународна помош во крајбрежната енклава во услови на строги израелски ограничувања за нејзиниот влез.