Шпанија одбива да се приклучи на Одборот за мир на Трамп

ОВИЕДО (АА) – Шпанија нема да се приклучи на американскиот „Одбор за мир“, изјави денес премиерот Педро Санчез, наведувајќи загриженост околу мандатот на иницијативата и недостигот од застапеност на Палестинците, јавува Анадолу.

Санчез оцени дека Одборот е „надвор од рамките на Обединетите нации“ и дека во него не е вклучена Палестинската управа.

„За иднината на Газа треба да одлучуваат Палестинците“, изјави тој за новинарите по неформалната средба на лидерите на Европската Унија во Брисел.

„Иднината на нивниот мирен и безбеден соживот со Израел мора да ја одлучуваат пред сè Израел и Палестина, преку процес заснован на дијалог што ќе го спроведе решението за две држави, ќе овозможи влез на хуманитарна помош и ќе гарантира мир меѓу двете земји“, додаде тој.

Шпанскиот лидер рече дека Шпанија „ја цени“ поканата, но одлучила да ја одбие поради „кохерентност“ со надворешната политика на Мадрид, за која рече дека се заснова на меѓународното право и мултилатералните институции.

„Шпанија ќе продолжи да работи на мировниот процес заедно со многу други европски партнери и меѓународната заедница“, додаде тој.

До вчера, повеќе од 20 земји се согласија да се приклучат на Одборот за мир, вклучувајќи ги Турција, Египет, Катар, Саудиска Арабија, Израел, Аргентина, Унгарија, Пакистан, Виетнам и Албанија.

Франција и Норвешка одбија да се приклучат на иницијативата, додека американскиот претседател Доналд Трамп ја повлече поканата упатена до Канада.

Претседателот на Европскиот совет вчера изјави дека европските лидери имаат „сериозни сомнежи за неколку елементи“ од повелбата на Одборот, вклучувајќи го неговиот опсег, начинот на управување и усогласеноста со Повелбата на ОН.

Иако Одборот првично беше замислен да го надгледува прекинот на огнот и обновата на Газа, неговата повелба го проширува мандатот и на градење мир во сите области погодени или изложени на ризик од конфликти.