Шпанија ќе ја забрани продажбата на енергетски пијалаци за деца под 16 години

ИСТАНБУЛ (АА) – Шпанија ќе ја забрани продажбата на енергетски пијалаци за малолетници под 16 години и ќе воведе ограничувања за верзиите со висока содржина на кофеин за лицата под 18 години, соопшти министерот за заштита на потрошувачите Пабло Бустиндуј, јавува Анадолу.

Со планираната регулатива, сите енергетски пијалаци ќе бидат забранети за деца под 16 години.

Производите што содржат повеќе од 32 милиграми кофеин на 100 милилитри, исто така, ќе бидат забранети за лица под 18 години.

„Научно е докажано дека овие енергетски пијалаци станаа закана за здравјето на младите“, изјави Бустиндуј.

Според истражувањето ЕСТУДЕС 2025 на шпанското Министерство за здравство, 38,4 отсто од учениците на возраст од 14 до 18 години изјавиле дека консумирале енергетски пијалаци во изминатиот месец. Потрошувачката е значително повисока кај момчињата (45,7 отсто) отколку кај девојчињата (31 отсто). Највисока застапеност има кај машките на возраст од 16 до 18 години, каде што процентот надминува 48 отсто.

Податоците од Шпанската агенција за безбедност на храната и исхраната (АЕСАН) покажуваат дека 25 отсто од населението во Шпанија консумира енергетски пијалаци, во просек 2,1 пат неделно.

Речиси половина од потрошувачите пијат најмалку еден енергетски пијалак дневно, а 47 отсто редовно го мешаат со алкохол, комбинација за која властите предупредуваат дека ги зголемува ризиците од интоксикација и кардиоваскуларни компликации.

Пазарните бројки укажуваат на брз раст на секторот. Шпанците во 2025 година купиле 105 милиони литри енергетски пијалаци, што е зголемување од 13,7 отсто во однос на претходната година. Продажбата пораснала за 38,7 отсто во последните четири години, достигнувајќи речиси 300 милиони евра (околу 350 милиони долари) годишно.

Бустиндуј истакна дека мерката ја изедначува Шпанија со земји како Германија, Норвешка, Полска, Летонија, Унгарија и Литванија, кои веќе воведоа слични ограничувања.

Министерството минатата година ја забрани продажбата на енергетски пијалаци во училиштата низ целата земја.