Јапонскиот министер за надворешни работи, Хајаши, „отворен за разговори“ со својот кинески колега

ТОКИО (АА) - Министерот за надворешни работи на Јапонија, Хајаши Јошимаса, истакна дека на маргините на Генералното собрание на Обединетите нации (ОН) кое ќе се одржи на крајот на месецот, може да се сретне со својот кинески колега Ванг Ји, пренесува Агенција Анадолија (АА).

Министерот Хајаши на прес-конференцијата се осврна на неочекуваното откажување на Ванг од планираната билатерална средба по посетата на американската делегација на Тајван минатиот месец.

Истакнувајќи дека тој е „отворен за билатерални разговори“ со Ванг на маргините на Генералното собрание на ОН во периодот 21 - 27 септември, Хајаши рече: „Верувам дека дијалогот на различни нивоа е важен.“

Септември 2022 година се совпаѓа со 50-годишнината од нормализацијата на билатералните дипломатски односи меѓу Јапонија и Кина.

На споменатиот самит би можело да се разговара за можната средба на кинескиот претседател Си Џинпинг и јапонскиот премиер Кишида Фумио.

- Шефовите на дипломатија на двете земји последен пат се сретнаа во ноември 2020 година

Делегација предводена од претседателката на Претставничкиот дом на САД, Ненси Пелоси, го посети Тајван на почетокот на август.

Пелоси стана првиот претседател на Претставничкиот дом на САД кој го посети островот во последните 25 години.

По посетата, која наиде на реакција на Кина, Ванг одеднаш ја откажа планираната средба со својот јапонски колега во Камбоџа.

Министрите за надворешни работи на соседните земји последен пат се сретнаа лице в лице во ноември 2020 година.