Четирикратниот шампион Себастијан Фетел се повлекува од Формула 1 на крајот на сезоната

ИСТАНБУЛ (АА) - Германскиот возач Себастијан Фетел од Астон Мартин, еден од тимовите на Формула 1, соопшти дека одлучил да се повлече од Формула 1 на крајот на оваа сезона, пренесува Агенција Анадолија (АА).

На својот профил на Инстаграм, соопштувајќи го своето повлекување од Формула 1, 35-годишниот Фетел рече: „Пензионирањето беше одлука за која размислував долго време и одлука која беше тешко да ја донесам. На крајот на годината ќе одвојам време за себе за да донесам одлука на што ќе се фокусирам во иднина. Мој приоритет ќе биде да поминувам повеќе време со моето семејство.“

Фетел освои четири светски шампионати по ред од 2010 до 2013 година со тимот на Ред Бул. Во својата кариера Фетел исто така освои 53 гран при трки и 57 полпозиции.

Искусниот Фетел со 53 гран при победи е трет на листата возачи со најмногу победи на трките, зад Луис Хамилтон (103) и Михаел Шумахер (91).

Исто така, Фетел е на четвртото место меѓу возачите со најмногу шампионски титули, по Хамилтон (7), Шумахер (7) и Хуан Мануел Фанџио (5).