Акар: „Молкот за ерменската окупација на азербејџанска територија и масакрите врз цивилите е лицемерие“

ИСТАНБУЛ (АА) - Турскиот министер за одбрана, Хулуси Акар, денеска изјави дека Ерменија треба да се повлече од азербејџанската територија која ја окупираше пред какви било преговори за прекин на огнот, јавува Агенција Анадолија (АА).

„Оние што молчат за окупираната азербејџанска територија треба да обезбедат повлекување на Ерменија од Карабах, наместо да повикуваат на прекин на огнот“, рече Акар на настан во турската метропола Истанбул.

Тој истакна дека молкот за ерменската окупација на азербејџанската територија Нагорно Карабах и за масакрите врз цивилите претставува лицемерие.

„Сега постои нова можност за трајно решавање на прашањето за Нагорно Карабах“, рече тој, додавајќи: „Не можеме да си дозволиме да губиме време уште 30 години.“

Пограничните судири избувнаа на 27 септември, кога ерменските сили започнаа со напади врз азербејџанските цивилни населби и воени позиции, кои резултираа со жртви.

Односите меѓу двете поранешни советски републики се тензични од 1991 година, кога ерменската војска го окупира Нагорно Карабах, меѓународно призната територија на Азербејџан.

Четири резолуции на Советот за безбедност на ОН и две резолуции на Генералното собрание на ОН, како и многу меѓународни организации, бараат повлекување на окупациските сили.

Групата Минск на ОБСЕ, со која копретседаваат Франција, Русија и САД, беше формирана во 1992 година, со цел изнаоѓање решение за конфликтот, но досега без резултат. Издејствувано е примирје во 1994 година.

Франција, Русија и НАТО, меѓу другите, повикаа на итен прекин на судирите во окупираниот регион.