Faruk Zorlu
20 Декември 2022•Ажурирај: 21 Декември 2022
АНКАРА (АА) – Шефот на Дирекцијата за комуникации при Претседателството на Република Туркије, Фахретин Алтун, рече дека Туркије ја повикала Франција да ја поддржи глобалната соработка во борбата против тероризмот во светот, јавува Агенција Анадолија (АА).
Алтун учествуваше на панелот „Турско-француски односи, можности и предизвици“ во Анкара, а во својот говор истакна дека Европската Унија (ЕУ) ја признава ПКК како терористичка организација, но дека припадниците на таа организација можат да бидат присутни и активни во Франција.
„Анкара, исто така, очекува Франција и другите сојузници на НАТО да ги прекинат сите демонстрации и активности на ПКК и да ја поддржат борбата против таа терористичка организација и ПЈД/ЈПГ како нејзин сириски огранок“, рече Алтун.
Тој предупреди дека терористичката кампања на ПКК за дезинформирање не само што ќе им наштети на билатералните односи меѓу Анкара и Париз, туку и на самата Франција.
„Францускиот цементен гигант Лафарж пружа поддршка за многу терористички организации, вклучително и ДЕАШ. Ова навистина ќе биде темна дамка во историјата на Франција“, рече Алтун.
Во октомври, американскиот суд ја казни компанијата „Лафарж“ со парична казна од 778 милиони долари за поддршка на неколку терористички организации во Сирија во 2013 и 2014 година, вклучително и поддршка на терористите на ДЕАШ.
„Покрај тоа, Париз би требало да ги поддржи улогата и напорите на Анкара во решавање на кризата во Источниот Медитеран, Либија и Украина. Наметнувајќи се како стабилизирачки актер, Туркије го направи својот дел и продолжи да го прави тоа за да спречи понатамошно продлабочување на кризата во Украина“, изјави Алтун.
Истакнувајќи дека Франција и Европа се соочуваат со предизвици во решавањето на илегалните миграции, Алтун истакна дека Туркије треба да се земе за пример и да се создаде култура на заедничка работа.
„Во земјите како што се Сирија и Либија, политиката на Париз би требало да биде во согласност со Анкара“, додаде Алтун.
Туркије и Франција имаат долгогодишни историски врски, а Алтун рече дека соработката може дополнително да се интензивира на различни полиња, вклучително и решавање на нерегуларните миграции, одбранбената индустрија и борбата против тероризмот.
