ИСТАНБУЛ (АА) - Турскиот претседател Реџеп Таип Ердоган денес изјави дека Туркије ќе насочи ресурси во вкупна вредност од 30 милијарди долари што се состојат од даночни олеснувања и грант-поддршка за инвестирање во високата технологија, јавува Анадолу.

Говорејќи на церемонијата за претставување на Програмата за поттикнување на високата технологија во земјата (ХИТ-30) во Истанбул, тој рече дека Туркије има за цел да стане регионален производствен центар според капацитетот за производство на батерии и да понуди стимулативен пакет за инвеститорите вреден 4,5 милијарди долари.

„Земјата, исто така, лансира стимулативен пакет во вредност од 5 милијарди долари за да го зголеми својот производствен капацитет во автомобилскиот сектор на најмалку еден милион единици годишно“, рече Ердоган.

„За пет години, Анкара ќе покрива половина од трошоците за персоналот во новите центри што ќе бидат основани во земјата од 1.000 светски компании во однос на истражување и развој“, додаде тој.

„Наша цел е да го поддржиме производството на клучни компоненти и офшор турбини за ветерната енергија и да изградиме автохтон бренд за ветерна енергија“, рече турскиот претседател.

„Туркије ќе обезбеди грант-поддршка до 8.000 долари по мегават за инвестиции во ќелии со цел да се воспостави капацитет од 15 гигавати во соларната енергија“, рече тој.

„Владата го трасираше патот за светските автомобилски компании и другите големи производители на возила да ги насочат своите инвестиции во електрични возила во Туркије“, рече Ердоган.

„Наша цел е да донесеме најмалку 20 милијарди долари инвестиции од приватниот сектор во нашата земја, што ќе придонесе многу за нашето развојно патување во областа на технологијата“, додаде тој.

- Говорот на Нетанјаху во американскиот Конгрес -

Осврнувајќи се на говорот на израелскиот премиер Бенјамин Нетанјаху во американскиот Конгрес, Ердоган рече: „Целиот свет виде како на геноциден убиец му аплаудираа во американскиот Конгрес“.

„Претставничкиот дом на САД им аплаудираше на оние кои масакрираа речиси 40.000 деца, жени и постари лица“, додаде тој.

„Оние кои на светот му даваат лекции за демократија и човекови права, не покажуваат ниту грам срам кога го крунисуваат Хитлер на нашето време“, рече тој.

„Глобалниот систем, кој беше воспоставен за да ги заштити економските, политичките, воените и дипломатските интереси на победниците во Втората светска војна, почна да застарува“, додаде тој.