Источна Турција: Рибарите ‘вадат леб’ на 30 см од под мразот

МУШ (АА) - Жителите на Муш, источна Турција, доаѓаат на езерото Хамурет (Акдоган) каде што од под дебелиот слој мраз ловат риби и така заработуваат за живот, јавува Anadolu Agency (AA).

Екстремно ниските температури предизвикаа делумно замрзнување на многу езера и реки, поради што рибарите мораат со моторна пила да го сечат мразот на езерото Хамурет во источниот дел на Турција.

Езерото се наоѓа на 2.149 метри надморска височина, а жителите го посетуваат и покрај ектремно студеното време.

Дебелината на мразот изнесува и до 30 сантиметри, поради што е неопходно со моторна пила да се расече ледениот слој и да се спушти рибарската мрежа со која наредниот ден ќе извлечат риба.

Рибарот Ферхат Башаран изјави дека по тешката работа на површината на езерото, фрлаат мрежа и ловат риба.

„’Лебот го вадиме’ од под мразот. Работиме во тешки услови, но така преживуваме. Секое утро го кршиме ледениот слој дебел 30 сантиметри, а потоа ја фрламе мрежата. Утредента доаѓаме и ја извлекуваме“, изјави Башаран, кој додава дека еден килограм уловена риба ја продаваат за шест лири (околу 1,6 евра).

Работата во вакви услови е опасна и рибарите се свесни за тоа, но велат дека немаат друг избор, бидејќи на тој начин го прехрануваат своето семејство.