Расте побарувачката за оружјето против дронови од турско производство

АНКАРА (АА) - Откако го произведе првото турско електромагнетско оружје против беспилотните летала, технолошката фирма „Harp Arge (R&D)“ (Харп Арџ) разви нов модел за меѓународниот пазар.

Генералниот координатор на Харп-Арџ, Ајтеккин Гучлу, денес за Anadolu Agency (AA) изјави дека започнале маркетинг партнерство со турската компанија за градежна и одбранбена индустрија Коза, откако добиле голема побарувачка од странство.

Гучлу рече дека „Коза“ активно продава оружје за беспилотни летала во земјите од Блискиот Исток и Африка.

„Ние направивме демо-студии во одредени земји и добивме успешен повратен одговор“, рече тој.

Гучлу, исто така, истакна дека саемот за одбрана што ќе се одржи во Бахреин во октомври ќе им овозможи да запознаат потенцијални клиенти.

Првиот извоз на оружјето е направен во Азербејџан откако армијата на земјата го тестираше. Ова анти-беспилотно оружје во моментов е во употреба од страна на турската војска и полиција.

„Harp Arge“ се фокусира на задоволување на потребите на турската војска за беспилотни системи, електронско војување и роботика.

Основното тело на новиот модел е направено од композит од јаглеродни влакна, кој е издржлив и лесен материјал.

Системот со 22 милиметарски пикатински потпирачки систем, кој е светски стандард, се наоѓа од сите страни на оружјето со цел да може да се прилагоди.

Пикатинскиот потпирач му овозможува на корисникот да додава додатоци. Благодарение на овој систем, нишанот или црвената точка може лесно да се додадат на пушка.

За лесно носење се додаваат совитлив кундак и рачка. Освен тоа, трајноста на батеријата на оружјето против дронови е зголемена на 90 минути.