Emre Başaran
06 Август 2023•Ажурирај: 07 Август 2023
Туркије најостро ја осуди новата провокација на терористичката организација ПКК во Шведска, чија цел беше турскиот претседател Реџеп Таип Ердоган, пренесува Анадолу.
„Најостро го осудуваме фактот дека на група поврзана со ПКК ѝ беше дозволено да прави пропаганда со симболи на терористичка организација и да изврши безобразен чин против нашиот претседател“, се вели во соопштението на Министерството за надворешни работи на Туркије.
Министерството ги истакна обврските преземени од страна на шведската Влада во контекст на спречување на дејствата на терористичката организација ПКК и нејзините ограноци.
Претходно, приврзаниците на терористичката организација ЈПГ/ПКК извршија провокативен чин ставајќи ЛГБТ симболи на таканаречениот лик на Ердоган на собирот на ЛГБТ што се одржа во Стокхолм.
Носејќи парчиња ткаенина што ја симболизираат терористичката група ЈПГ/ПКК, демонстрантите се спротивставија и на кандидатурата на Шведска за НАТО.
„Најостро ја осудувам провокацијата на поддржувачите на терористичката организација ПКК, која се случи денес во Стокхолм, главниот град на Шведска“, напиша министерот за правда Јилмаз Тунч на платформата на социјалната мрежа Х, поранешен Твитер.
„Неприфатливо е Шведска да дозволи активности на терористички организации и да молчи за провокациите против нашиот претседател. Шведска, која сака да стане наш сојузник во НАТО, мора да остане верна на своите обврски со тоа што да не дозволува активности на терористички организации. Тероризмот е злосторство против човештвото. Примарна должност на правните држави е да ги спречат сите видови дејства на терористичките организации“, напиша тој.
