Yusuf Soykan Bal
15 Јануари 2026•Ажурирај: 16 Јануари 2026
АНКАРА (АА) - Турското Министерство за национална одбрана денес ја повтори поддршката за единството и територијалниот интегритет на соседна Сирија, јавува Анадолу.
На прашањето за најновите случувања во Сирија на неделниот брифинг за медиумите, извори од Министерството изјавија дека сириската Влада спровела успешна антитерористичка операција во Алепо, со цел воспоставување на јавниот ред и осигурување на безбедноста на цивилите.
„Сириската Влада, која дејствува за да обезбеди единство и кохезија врз основа на еднаквост на сите етнички групи во Сирија, успешно спроведе антитерористичка операција во Алепо, со цел воспоставување јавен ред и заштита на животите на граѓаните“, рекоа тие.
Тие повторија дека Турција не ја гледа безбедноста на Сирија како одвоена од својата и ја нагласија својата поддршка за принципот „една држава, една армија“.
„Сакаме уште еднаш да повториме дека безбедноста на Сирија ја сметаме за неразделна од нашата и дека, во согласност со принципот 'една држава, една армија', подготвени сме да ја поддржиме борбата на Сирија против терористичките организации доколку биде побарана таква поддршка, врз основа на единството и територијалниот интегритет на Сирија.“
Во март 2025 година сириското Претседателство објави договор за интеграција на СДФ во државните институции, потврдувајќи го територијалното единство на земјата и отфрлајќи ги сите обиди за поделба.
Во април минатата година сириските власти потпишаа посебен договор за населбите Шеик Максуд и Ашрафие во Алепо, со кој се предвидува дека двете населби остануваат административни делови на градот, почитувајќи ја нивната локална посебност.
Договорот вклучуваше одредби со кои се забрануваа вооружени испади, оружјето се дозволува само за внатрешните безбедносни сили и се бараше повлекување на СДФ во областите источно од реката Еуфрат во Североисточна Сирија.
Сепак, властите соопштија дека СДФ не ги исполниле условите од договорот.
Сириската Влада ги интензивираше напорите за враќање на безбедноста низ целата земја по соборувањето на режимот на Ал-Асад во декември 2024 година, кој беше на власт 24 години.
