Derhênerê Mardînî çîrokên Anadoluyê digihîne dinyayê

ŞANLIURFA

Derhêner Mustafa Uluçê ku belgefîlmên wî di gelek pêşbirkên neteweyî û navneteweyî de xelat girtine hewl dide çîrokên rastîn ên Anadoluyê bigihîne dinyayê.

Uluç dema zarok bûye fîlmên karton temaşe kiriye û xwestiye ku bibe derhêner. Piştî ku di Fakulteya Ragihandinê ya Zanîngeha Erciyesê beşa Radyo Televîzyon û Sînemayê qezenc kiriye bi hevalên xwe ra kurtefîlman kişandiye û di gelek pêşbirkên neteweyî û navneteweyî de xelat girtine.

Belgefîlma wî ya bi navê "Bûkên Aliyên Sînor ê Din" ya 18 deqîqeyî ya ku behsa bûkên ji Sûriyeyê hatine û li Mêrdîn û Cizîrê dijîn dike li Almanya, Fransa û Polonyayê xelat girt. Heman belgefîlmê di Pêşbirka Belgefîlmên TRTyê ya 2013an de jî xelat stend.

Piştî van xelatan Uluç belgefîlma bi navê "Lat" a ku behsa gundiyên Batmanî yên di şikeftan de dijîn dike, belgefîlma bi navê "Bargiran" a behsa zarokên ji Şanliurfayê yên hemal in dike û belgefîlma bi navê "Milyaketên Bêwar" a behsa welatiyên Sûriyeyê yên li Herana navçeya Şanliurfayê dijîn dike, kişand.

Bi alîkariya mamosteyên Zanîngeha Heranê atolyeyek fîlman vekir û dersê dide xwendekarên meraqa wan li ser sînemayê heye.

- "Xeyala min a herî mezin fîlmeke metraja wê dirêj kişandine "

Armanca Uluç ew e ku çîrokên rastîn ên li Anadoluyê bi rêya sînemayê bigihîne dinyayê.

Mustafa Uluç ji nûçegihanê AAyê ra behsa jiyan, xebat û belgefîlmên xwe kir û got hin caran malbat naxwazin, lê ew bizehmetî wan qanî dike, tişta herî zehmet jî budçe ye.

Uluç got xelatên ku li Almanya, Fransa, Îran, Iraq, Çekoslavakya û Polonyayê hildane wî motîve kiriye û wiha axivî: "Xeyala min a herî mezin fîlmeke metraja wê dirêj kişandin e. Lê dema ez vê bikim naxwazim ew ticarî be. Gelek fîlmên em niha li Tirkiyeyê temaşe dikin nirxên Rojavayê dişopînin û pêşkeşî temaşevanan tên kirin. Armanca min a tekane ew e ku ez fîlmeke metraja wê dirêj a ku behsa nirxên me dike bikşînim. Ez gelek derhênerên hoste dişopînim wek Nurî Bilge Ceylan, Dervîş Zaîm, Yilmaz Erdogan. Ez dixwazim derhênerekî hoste yê wek Yilmaz Erdogan nas bikim û li ser van fîlmên ku me kişandine biaxivim. Hêvî dikim evê pêk bê."