Barzanî: "Kurdistan bi rêya aştiyane ber bi serxwebûnê ve diçe"

HEWLÊR

Serokê Herêma Kurdistanê Mesûd Barzanî, pêşwazî li Balyozê Hollandayê li Bexdayê Jan Waltmans û heyeta pê re kir.

Li gor daxuyaniya malpera resmî ya Serokatiya Herêma Kurdistanê Barzanî û Waltmans têkiliyên navbera Hollanda û Herêma Kurdistanê nirxandin.

Di hevdîtinê de herdu aliyan jî bal kişand ser têkiliyên baş û dostane yên di navbera Hollanda û Herêma Kurdistanê de.

Balyozê Hollanda Waltmans diyar kir ku ewlewiyeta wan li Iraqê şerê li dijî DEAŞê ye, loma perwerdeyê didin Pêşmerge û Artêşa Iraqê. Herwiha got Iraq ji bo Hollandayê piştî DEAŞê gelekî giring e û bi fikar li rewşa cihên azadbûyî temaşe dikin.

Di beramber de Barzanî jî anî ziman ku qonaxa piştî DEAŞê gelekî hestiyar e û ew faktorên ku bûne sedema derketina DEAŞê wek xwe bimînin dê kêşe û girîftên pir mezin çêbibin.

Herwiha der barê referandûmê de jî nirxandina xwe wiha kir:

"Xelkê Kurdistanê bi rêya îstişareyê û amûrê aştiyê ber bi serxwebûnê ve diçe. Ew ber bi misogerkirina heqê xwe ve dimeşin. Ev yek jî ji bo rêgirtina li ber şer û girîftên nû ye."