Li Erzirom, Erdexan û Qersê berf dibare

Li Erzirom, Erdexan û Qersê berf dibare, li Agiriyê sir û seqem tengasiyê dide kişandin.

Li Erziromê berfê serê sibehê dayê û park û baxçe çîl û spî bûn.

Welatiyan berfa ser wesayîtên xwe û pêşiya kargeha xwe paqij kirin.

Ekîbên Şaredarî û Rêbejan li herêmên ku lê berpirsyar in, xebat kirin ku di çûyîn û hatinê da tengasî dernekeve.

Medreseya Cotminare ya dîrokî, Keleha Erziromê, Sê Kumbet, Medreseya Yakutiyeyê û gelek berhemên dîrokî bi berfê xemilîn.

Li Navenda Xweşiqitandinê ya Palandokenê qalindahiya berfê 17 santêm hat pîvan.

- Erdexan

Li Erdexanê jî berf dibare.

Li bajarê ku kuçe û kolanên wê di binê berfê da man, ekîbên Rêbejan, Îdareya Taybet a Bajêr û ekîbên şaredariyê xebat da destpêkirin.

Bi şev ji ber berf û bagerê rêya 9 gundan hat girtin û ekîban paşê rê vekirin.

Karkerên ku li derva dixebitin, agir vêxist û xwe li ber germ kirin.

Oktay Balciyê ku karê lastîkên wesayîtan dike, diyar kir, ji ber ku ew li derva dixebitin serma zorê dide wan û wiha dewam kir, "Ji bo ku em xwe germ bikin, em agir vêdixin. Hem em hem mişteriyên me germ dibin. Êdî hewa sar e."

- Agirî

Li Agiriyê jî sir û seqem heye.

Li bajarê ku deverên wê yên bilind berf bariye, serma tengasiyê dide kişandin.

Mehmet Gunay Eserê ku li navçeya Dutaxê dijî, di sir û seqemê da jî bo bota xwe li ser Çemê Muradê geriya.

- Qers

Li Qersê du roj in bi navber berf dibare.

Ji ber berfa ku carinan zêde dike, şofêr tengasiyê dikişînin, ekîban rê xoy kir.

Personelên şaredariyê berfa ser rê û peyarêyan paqij kir.

Li navçeyên Sariqamîş, Qaxizman, Susuz û Akyakayê jî berf barî.

Li pîstên etaba duyem a Navenda Xweşiqitandinê ya Cibiltepeyê qalindahiya berfê derket 25 santêman. Daristanên sariçamê spî bûn.

Li navçeya Akyakayê hin welatiyan berfa ser wesayîtên xwe û pêşiya kargehên xwe paqij kir.

Xwendekarên ku serê sibehê çûn dibistanê, beriya dersê bi topên berfê leyîstin.

Li navçeya Susuzê jî ekîbên EDAŞê yên Erez xetên ceyranê yên ku berf û cemed girtine, paqij kirin.