"له‌ هه‌رێمی كوردستان له‌سه‌روو 22 هه‌زار كرێكاری بیانی هه‌یە"

هه‌ولێر - AA
رێكخراوی رۆشنبیری و داكۆكیكردن له‌ كرێكارانی بیانی له‌ هه‌رێمی كوردستان پانێڵێكی به‌ناونیشانی "ره‌وشی كرێكارانی بیانی له‌ هه‌رێمی كوردستان له‌ روانگه‌ی یاسا و رێنماییه‌كان و ئاریشه‌ و چاره‌سه‌رییه‌كان" له‌ هۆڵی بۆنه‌كانی هۆتێل چوارچرا له‌ هه‌ولێر رێكخست.
سه‌رۆكی رێكخراوی رۆشنبیری و داكۆكیكردن له‌ كرێكارانی بیانی له‌ هه‌رێمی كوردستان، حه‌مه‌ هه‌ژار له‌ لێدوانێكدا بۆ ئاژانسی ئانادۆڵو رایگه‌یاند "ره‌وشی كرێكاران به‌تایبه‌ت و بەدیاریكراوی كرێكارانی بیانی له‌ هه‌رێمی كوردستاندا خراپه‌ و ئه‌وان له‌ ره‌وشێكی ناله‌باردا ده‌ژیین، هۆكاری ئه‌مه‌ش پێشێلكاریی مافه‌كانییانه‌ كه‌ له‌ غیابی نه‌بوون سیسته‌م له‌م وڵاته‌دایه‌".
سه‌باره‌ت به‌ ئاماره‌كانی پێشێلكارییه‌كانی دژبه‌ كرێكارانی بیانی ناوبراو روونیكرده‌وه‌ "ئاماره‌كانی په‌یوه‌ست به‌ پێشێلكارییه‌كان پێمان ده‌ڵێن رۆژ به‌ رۆژ زیادبوون هه‌یه‌ له‌ پێشێلكارییه‌كاندا له‌ دژی كرێكارانی بیانی، رۆژانش به‌ندی له‌ به‌ندیخانه‌كاندا زیاد ده‌بێت و یه‌كێك له‌ هۆكاره‌كان ئه‌وه‌یه‌ ره‌وشی ئه‌وان باش نییه‌، راسته‌ پرسه‌ داراییه‌كه‌ كاریگه‌ریی راسته‌وخۆی به‌سه‌ر ئێمه‌ و كرێكارانی بیانیش هه‌یه‌، له‌هه‌ر وڵاتێك كه‌ به‌قه‌یرانی داراییدا تێده‌په‌ڕێت كوشتن و دزی و رووداوی ناجۆر و خراپه‌كاری زیاد ده‌بێت، بۆیه‌ پێویستمان به‌ یاسا هه‌یه‌ له‌م بواره‌دا".
حه‌مه‌ هه‌ژار گوتی: "له‌ هه‌رێمی كوردستان له‌سه‌روو 22 هه‌زار كرێكاری بیانی هه‌یە".
ئه‌و گوتیشی: "چه‌ندین جۆر پێشێلكاریی دژبە كرێكارانی بیانی ئه‌نجام ده‌درێت، پێشێلكارییه‌كان له‌ به‌رامبه‌ر كرێكاری بیانی زۆرن ئه‌وانیش خۆیان له‌ لێدان، لێوه‌رگرتنه‌وه‌ی پاسپۆرت، ئه‌شكه‌نجه‌دان، به‌ندكردن، پاره‌پێ نه‌دان ده‌گرێته‌وه‌، خۆدزینه‌وه‌ له‌ مه‌سه‌له‌ی ئیقامه‌ و شتی دیكه‌ش، هه‌روه‌ها ده‌ستدرێژی و كڕین و فرۆشتن".
سه‌رۆكی رێكخراوی رۆشنبیری و داكۆكیكردن له‌ كرێكارانی بیانی له‌ هه‌رێمی كوردستان ئه‌وه‌شی گوت "هێشتا له‌ كوردستان مافی كرێكارانی بیانی پارێزراو نییه‌ و هۆكاره‌كه‌شی ئه‌وه‌یه‌ له‌ كوردستان ته‌نها رێنمایی هه‌یه‌ و یاسای كار نییه‌ و رێنماییه‌كانیش زۆر جار ناچێته‌ بواری جێبه‌جێكردنه‌وه‌".
سه‌باره‌ت به‌ داواكارییه‌كانیان بۆ كه‌مكردنه‌وه‌ و نه‌هێشتنی پێشێلكارییه‌كانی دژبه‌ كرێكارانی بیانی، حه‌مه‌ هه‌ژار گوتی: "داواكارین یاسای كار په‌سه‌ند بكرێت و یاسای كاری ئازادیی سه‌ندیكایی زیاتر بكرێت".