قەدەغەکردنی گالاکسی Note 7 لە کاتی گەشتکردن بە فڕۆکە

ستۆکھۆڵم

ھێڵی ئاسمانی ئەسکەندەنافیا کە بە ھێڵی ئاسمانی ھاوبەشی ھەر سێ وڵاتی سوید، دانیمارک و نەرویج دادەنرێت، ھێنانی گالاکسی Note 7 ی بۆ نێو فڕۆکەکانی قەدەغەکرد.

بەرێوەبەری راگەیاندنی ھێڵەکانی ئاسمانی ئەسکەندەنافیا فرێدریک ھێنریکسۆن رایگەیاند کە بەهۆی بوونی کێشەیەک لە پاتری و روودانی چەند تەقینەوەیەک لە کاتی شەحنکردنی، ھەڵگرتنی ئامێری مۆبایلی سامسونگی جۆری Note 7 ی لە نێو فڕۆکەکانی قەدەغە کرد.

راشیگەیاند کە نابێت گەشتیاران بە ھیچ شێوەیەك ئەم جۆرە مۆبایلە بھێننە نێو فڕۆکەکان. ئاشکراشی کرد کە ئەم رێوشوێنە ئەمنییە بە مەبەستی رێگری كردن لە سەرھەڵدانی ئاگرکەوتنەوە گیراوەتە بەر.

جەختیشی لەوە کردەوە کە بەمەبەستی سەلامەتی گەشتیاران ئەم بڕیارەیان داوە. لەدوای ئەمەش ھێڵەکانی ئاسمانی نەرویجیش ھەمان بڕیاریان دەرکرد.