بینالی یڵدرم: "دەچینە ھەڵبژاردنەوە و رۆژ دەژمێرین"

ئیستانبوڵ - AA

سەرۆکوەزیرانی تورکیا، بینالی یڵدرم رایگەیاند "دەچینە ھەڵبژاردنەوە و رۆژ دەژمێرین، بەڵام گەورەترین پارتی ئۆپۆزسیۆن ھیچ نووزەیەکی لێوە نایەت. براکەم ئەو ببێتە کاندید، یان ئەم ببێتە کاندید لە مانگەوە بیھێنین یان لە مەریخەوە لە بۆشایی ئاسمانەوە بێت؟ ئێوە لەنێو خۆتاندا ئەندامێکتان نییە کە ببێتە کاندیدی سەرۆکایەتی کۆمار؟ کاک کەمال، تۆ سەرۆکی پارتەکەیت، سەرۆکی گشتیی گەورەترین پارتی ئۆپۆزسیۆنی، ئەوەی کە شایەنی تۆیە ئەوەیە ببیتە کاندید و بڵێیت 'منیش ھەم'، بڵێیت منیش خوازیاری ئەوەم ببمە حوکمڕانی تورکیا. بۆچی دەرگا بە دەرگا دەگەڕێیت بۆ کاندید، بۆچی خۆت نابیتە کاندید، ببە. ئەگەر سەرکردەی پارتەکەی، ئەوەی کە گەل لێت چاوەڕێ دەکات ئەوەیە ببیتە کاندید، نەک ئەوەی بەدوای کاندیددا بگەڕێیت".