"هیچ کەسێک مافی ئەوەی نییە دەستوەردان لە کاروباری ناوخۆیی تورکیادا بکات"

ئەنقەرە- AA

وەزارەتی دەرەوەی تورکیا، دەربارەی هەندێک لەو راگەیەندراوانەی کە لەسەر رووداوەکانی زانکۆی بۆغازئیچی بڵاوکراونەتەوە، راگەیەنراوێکی بۆ رای گشتی بڵاوکردەوە.

لە راگەیەنراوەکەدا تیشک خراوەتە سەر ئەوەی کە لە تورکیا، مافی ئەنجامدانی خۆپیشاندان و ئازادی رادەربڕین بەشێوەیەکی دەستووریی دەستبەرکراوە.

باس لەوەشکراوە کە هێزە ئەمنییەکان، تا ئێستا بەپێی ئەو دەسەڵاتەی کە یاسا پێیداون، مامەڵەیان لەگەڵ هەر رووداوێک کردووە و لە بەجێهێنانی ئەرکەکانیان بەردەوام دەبن.

ئەوەش هاتووە کە هێزە ئەمنییەکان زانیاری ئەوەیان هەبووە کەسانێک لە دەرەوەی زانکۆی بۆغازئیچی و بۆ پشتیوانیکردن لە رێکخراوی تیرۆریستی دزەیان کردووەتە ناو خۆپیشاندانەکانەوە و بەم هۆیەوە بەگوێرەی ئەو یاسایانەی تایبەتن بە رێگریکردن لە گردبوونەوە و خۆپیشاندانی نایاسایی رێوشوێنی پێویست گیراونەتەبەر.

لە راگەیەنراوەکەدا، ئەوەش وەبیرهێندراوەتەوە کە بەشێکی زۆر لەو وڵاتانەی وەک وڵاتی پێشكەوتوو و دیموکراسی وەسفدەکرێن لە کاتی بوونی بچووکترین ناڕەزاییدا، هێزێکی زۆری ئەمنییان هێناوەتە بەرامبەر هاووڵاتییانی مەدەنیی.

داوا لەو وڵاتانەش کراوە کە تەماشای ئەو کارانەی خۆیان بکەن کە بەرامبەر خۆپیشاندان و ناڕەزاییەکان کردوویانە نەوەک دەربارەی تورکیا قسە بکەن، جەخت لەوەشکراوەتەوە کە هیچ کەسێک مافی ئەوەی نییە دەستوەردان لە کاروباری ناوخۆیی تورکیادا بکات.