گرتنەبەری زنجیرەیەك رێ و شوێن بۆ پاراستنی گیانی هاووڵاتییان لە فەللوجە

ئەندامێكی كۆمیسیۆنی مافەكانی مرۆڤ لە عێراق ئاماژە بەوە دەكات، لە میانی ئۆپەڕاسیۆنی كۆنترۆڵكردنەوەی شاری فەللوجە و شەڕ و پێكدادانەكان لەگەڵ چەكدارانی داعش، هێزەكانی ئەمنی زنجیرەیەك رێ و شوێنیان بۆ پاراستنی گیانی هاووڵاتییانی مەدەنی گەمارۆدراو، لە فەللوجە گرتووەتەبەر.

ئەندامی كۆمیسیۆنەكە فازڵ غەڕاوی بۆ ئاژانسی ئانادۆڵو ئاشكرای كرد، بە ئامانجی پاراستنی گیانی ئەو هاووڵاتییە مەدەنیانە كە لە شاری فەللوجە گەمارۆ دراون، هێزەكانی ئەمنی زنجیرەیەك رێ شوێنیان گرتووەتەبەر.

وەك غەڕاوی باسی لێوە دەكات، زنجیرە رێ و شوێنەكان كە هێزەكانی ئەمنی گرتوویانەتە بەر، بریتییە لە دوورخستنەوەی مەترسی شەڕەكان لە هاووڵاتییانی مەدەنی و هەروەها یارمەتیدانی هەڵهاتنی هاووڵاتییان لە شاری فەللوجە.

ئەندامی كۆمیسیۆنەكە دەشڵێت، هێزەكانی ئەمنی، چوار دەروازەی پارێزراویان بۆ دەرچوونی هاووڵاتییانی مەدەنی لە فەللوجە دیاری كردووە و ئەوانەش ناتوانن دەربچن، پێیان گوتراوە كە ئاڵای سپی بەرز بكەنەوە تا هێزەكانی ئەمنی لە چەكدارانی داعش جیایان بكەنەوە.

فازڵ غەڕاوی هەروەها گوتی: "نیگەرانی و مەترسییەكان كە نەتەوە یەكگرتووەكان لەبارەی چارەنووسی زیاتر لە 50 هەزار مەدەنی لە فەللوجە دەربڕیوە، مانای ئەوە نییە، هێزەكانی ئەمنی لە شەڕەكاندا لە فەللوجە مافەكانی خەڵكی مەدەنی پێشێل بكەن بەڵام نەتەوە یەكگرتووەكان هەمیشە لە دۆخی جەنگ و شەڕەكاندا، هانی لایەنە بەرپرسەكان دەدەن كە رێ و شوێن بۆ پاراستنی گیانی هاووڵاتییانی مەدەنی بگرنەبەر".

هەر ئەمڕۆ ئەندامی لیژنەی ئەمنی لە ئەنجوومەنی پارێزگای ئەنبار، راجع بەرەكات هێزەكانی حەشدی شەعبی بە بۆردومانكردنی شاری فەللوجە تۆمەتبار كرد و داواشی لە سەرۆكوەزیران حەیدەر عەبادی كرد كە ئەوان لە ئۆپەڕاسیۆنی كۆنترۆڵكردنەوەی شارەكە دوور بخاتەوە.

پێشتر یەكێك لە سەرۆك هۆزەكانی فەللوجەش رایگەیاند، هێزەكانی سوپا و حەشدی شەعبی بەچڕی شاری فەللوجە بۆردومان دەكەن كە بەهۆیە 10 هاووڵاتی مەدەنی كوژراون و 25 کەسی دیكەش بریندار بوون.