ئه‌مریکا: ''بوونی په‌که‌که‌ له‌شنگال مایه‌ی دڵه‌راوکێیه‌''

گوته‌بێژی وه‌زاره‌تی به‌رگریی ئه‌مریکا (پێنتاگۆن) پیته‌ر کوک ئاماژه‌ی به‌وه‌کرد پشتیوانیی داواکارییه‌که‌ی سه‌رۆکوه‌زیرانی عێراق به‌مه‌به‌ستی چۆڵکردنی شنگال له‌لایه‌ن په‌که‌که‌وه‌ ده‌که‌ن و جه‌ختی له‌وه‌کرده‌وه‌ بوونی په‌که‌که‌ له‌و ناوچه‌یه‌ مایه‌ی دڵه‌ڕاوکێ و نیگه‌رانییه‌.

پیته‌ر کوک له‌کۆنگره‌ی رۆژنامه‌وانیی رۆژانه‌ی خۆیدا، وه‌ڵامی پرسیاری رۆژنامه‌وانانی دایه‌وه‌.

له‌وه‌ڵامی پرسیارێکدا سه‌باره‌ت به‌هه‌ڵوێستی ئه‌مریکا له‌باره‌ی داواکارییه‌کانی هه‌ریه‌ک له‌ حه‌یده‌ر عه‌بادی و به‌رپرسانی هه‌رێمی کوردستان به‌مه‌به‌ستی چۆڵکردنی شنگال له‌لایه‌ن په‌که‌که‌وه‌، کوک گوتی: ''پشتیوانیی له‌گوته‌کانی عه‌بادی له‌وباره‌یه‌وه‌ ده‌که‌ین، ئه‌و بابه‌ته‌ به‌رده‌وامه‌ له‌وه‌ی ببێته‌ مایه‌ی دڵه‌ڕاوکێ و نیگه‌رانیی بۆ ئێمه‌''.

گوته‌بێژه‌که‌ی پێنتاگۆن جه‌ختی له‌وه‌کرده‌وه‌ که‌ په‌که‌که‌ له‌لیستی تیرۆری ئه‌مریکادایه‌ و رایگه‌یاند:

''عێراق وڵاتێکی خاوه‌ن سه‌روه‌رییه‌. سه‌رۆکوه‌زیران ۆه‌یده‌ر عه‌بادیش به‌ناوی ئه‌و وڵاته‌وه‌ قسه‌ ده‌کات، له‌به‌ر ئه‌وه‌ پشتیوانیی هه‌موو گوته‌یه‌کی ده‌که‌ین که‌ پێویسته‌ بیکات''.