"عێراق به‌شێك نییه‌ له‌و سزایانه‌ی ئه‌مریكا به‌سه‌ر ئێراندا سه‌پاندوویه‌تی"

به‌غدا - AA

سه‌رۆكوه‌زیرانی عێراق، عادل عه‌بدولمه‌هدی ئاماژه‌ی به‌وه‌ كرد كه‌ وڵاته‌كه‌ی له‌ سزا سه‌پێندراوه‌كانی ئه‌مریكا به‌سه‌ر ئێراندا به‌خشراوه‌، چونكه‌ بێ لایه‌ن بووه‌ له‌ ململانێیەكانی ناوچه‌كه‌دا.

له‌ میانی كۆنگره‌ی رۆژنامه‌وانی هه‌فتانه‌یدا له‌ به‌غدا، عه‌بدولمه‌هدی وه‌ڵامی پرسیاری رۆژنامه‌نووسانی دایه‌وه‌ و سه‌باره‌ت به‌ په‌یوه‌ستبوون یان په‌یوه‌ستنه‌بوونی به‌و سزایانه‌ی کە ئه‌مریكا به‌سه‌ر ئێراندا سه‌پاندوویه‌تی گوتی: "عێراق به‌شێك نییه‌ له‌و سزایانه‌ی ئه‌مریكا به‌سه‌ر ئێراندا سه‌پاندوویه‌تی، چونكه‌ له‌ ململانێی هه‌رێمیدا لایه‌نگر نییه‌".

عه‌بدولمه‌هدی باسی له‌وه‌ كرد كه‌ ناوی ئه‌و هه‌شت وه‌زیره‌ی پێشكه‌ش به‌ په‌رله‌مان كردووه‌ كه‌ هێشتا ده‌نگیان له‌سه‌ر نه‌دراوه‌ و هه‌ڵنه‌بژێردراون و ئاماژه‌ی به‌وه‌ كرد كه‌ به‌پشتیوانی په‌رله‌مان له‌ كورترین ماوه‌دا ئه‌و وه‌زیرانه‌ هه‌ڵده‌بژێردرێن، به‌ڵام زانیاری نه‌دا له‌باره‌ی واده‌ی دانیشتنی په‌رله‌مان له‌سه‌ر ئه‌و بابه‌ته‌.