چین یەکەم کاروانی فڕۆکەی جەنگی Su-٣٥ی وەرگرت

رووسیا، یەکەم کاروانی فڕۆکەی جەنگی Su-٣٥ی رادەستی چین کرد کە پێنجەمین نەوەی ئەو فڕۆکەیەیە و پێشکەوتووترین فڕۆکەی جەنگیی فرە فەرمانە.

بەپێی ھەواڵێکی رۆژنامەی گڵۆباڵ تایمز کە یەکێکە لە ئۆرگانە فەرمییەکانی پارتی کۆمۆنیستی چین، رادەستکردنی فڕۆکەکان لە ناوەندی مەشق و راھێنانی ئاسمانیی ھیبەی سانگچون بەڕێوەچووە.

رووسیا و چین، ساڵی رابردوو رێککەوتنێکیان واژوو کرد بۆ کڕینی ٢٤ فرۆکە و لە قۆناغی یەکەمیشدا چوار فڕۆکە رادەستکران.

فڕۆکەی جەنگیی Su-٣٥، توانای ئاراستەکردنی مووشەکی ئاسمان-ئاسمان و ئاسمان-زەمینی ھەیە و، دەتوانێت ھەشت تۆن ھەڵبگرێت.

فڕۆکەکە یەک فڕۆکەوانی ھەیە و دەتوانێت لە یەک کاتژمێردا دوو ھەزار و ٥٠٠ کیلۆمەتر ببڕێت بێ ئەوەی پێویستی بە وەرگرتنەوەی سووتەمەنی ھەبێت لە ئاسمان. ھەروەھا توانای بڕینی سێ ھەزار و ٤٠٠ کیلۆمەتر مەودای ھەیە.

رێککەوتنی Su-٣٥ نێوان ھەردوو وڵات لە شاری کۆمسۆمۆلسک-نا-ئاموری خۆرھەڵاتی رووسیا و بەداخراوی بەڕووی راگەیاندنەکاندا ئەنجامدرا.

بۆ ھەر فڕۆکەیەک، چین نزیکەی ٨٥ ملیۆن دۆلار دەداتە رووسیا کە تێکڕا دەکاتە بڕی دوو ملیار دۆلار.