مۆسکۆ - AA

جێگری سەرۆکی ئەنجوومەنی ئاسایشی ڕووسیا، دیمیتری مێدڤێدیڤ سەبارەت بە سەرۆکی فەڕەنسا، ئیمانوێل ماکرۆن کە مۆسکۆی بە مەترسیی بۆ سەر ئەوورووپا لەقەڵەمدا، ڕایگەیاند: "خۆی زۆری پێ بچێت هەتا ١٤ی ئایاری ٢٠٢٧ بۆ هەتا هەتایە نامێنێت و بیریشی ناکرێت".

مێدڤێدیڤ لە هەژماری خۆی لە تۆڕی کۆمەڵایەتی وەڵامی ماکرۆنی دایەوە، کە ڕووسیای بە مەترسیی بۆ سەر ئەورووپا و فەڕەنسا تۆمەتبار کردبوو.

دیمیتری مێدڤێدیڤ ناوی ماکرۆنی بە "میکرۆن" نووسی و، ڕایگەیاند: "میکرۆن خۆی مەترسییەک دروست ناکات. زۆری پێ بچێت لە ١٤ی ئایاری ٢٠٢٧دا بۆ هەتا هەتایە نامێنێت و بیریشی ناکرێت".

دوێنێ ماکرۆن لە میانی گوتارێکیدا بۆ نەتەوەکەی، ئاماژەی بەوە کرد ڕووسیا پلانی هەیە هەتا ساڵی ٢٠٣٠ بە خەرجی زیاتر لە ٤٠ ملیار یۆرۆ، سێ هەزار تانک و ٣٠٠ فڕۆکەی جەنگی سوپاکەی زیاتر گەشەپێبدات و گەورەی بکات، بەوەیش بەردەوامە لە دروستکردنی مەترسیی لەسەر ئاسایشی ئەورووپا.