بان کی مۆن: "کۆبوونەوەکانی قەیرانی سووریا ئەنجامیان دەبێت"

نەتەوە یەکگرتووەکان

سکرتێری گشتیی نەتەوە یەکگرتووەکان بان کی مۆن لە کۆنگرەیەکی رۆژنامەوانیدا لەبارەی رەوشی ئێستای سووریا و کێشەی پەنابەرانەوە دوا. ئەو گوتی: "کۆبوونەوەکانی ڤیەننا سەرەداوێکی بۆ دۆزینەوەی کلیلی چارەسەریی لە سووریا پێداون و بیر لەوە دەکەینەوە لە سەرەتای ساڵی تازەدا کەشوهەوایەکی گفتوگۆ بۆ سوورییەکان بڕەخسێنین کە نزیکیان بکاتەوە لە چارەسەر".

بان کی مۆن هەنگاوەکانی ئەم دواییەی بە بەرز نرخاند و جەختی کردەوە کە 23 وڵات بەشداریی کۆبوونەوەکان دەکەن و ئەمەی بە هیوایەک بۆ چارەسەرکردنی قەیرانی سووریا وەسف کرد.

سکرتێری گشتیی رێکخراوی نەتەوە یەکگرتووەکان هەروەها پێی وایە رەخساندنی هەلی کۆبوونەوە لە نێوان ئۆپۆزسیۆنی سووریا و وڵاتانی وەک سعوودیە زۆر گرنگە و کردنەوەی سەکۆی گفتوگۆ لەگەڵ سوورییەکان لەلایەن نوێنەری نەتەوە یەکگرتووەکان بۆ کاروباری سووریا ستیڤان دیمستۆرا کارەکان خێراتر دەکات. هەروەها مۆن بە پێویستی زانی هەنگاوی کرداری و راستەقینە بنرێت.

بان کی مۆن لەبارەی سێیەم کۆبوونەوە لەبارەی رەوشی سووریا لە رۆژی 18ی ئەم مانگە و دەنگۆی ئەنجامدانی ئەو کۆبوونەوەیە لە نیویۆرک گوتی: "ئەوەی من ئاگەداری بم نوێنەری وڵاتانی بەشداربوو لە هەوڵی ئەوەدان سێیەم کۆبوونەوە لە نیویۆرک ئەنجام بدەن. منیش بە پەرۆشەوە چاوەڕێی ئەو کاتەم".