شنگال.. چۆڵکردنی ھەشت بنکەی یەپەشە

شنگال - AA

بەپێی زانیارییەکان، ھەشت بنکەی یەپەشە چۆڵکراون کە دووانیان لە سەنتەری شنگال، رادەستی ئاسایشی نیشتمانیی عێراق کراونەتەوە.

هەر بەپێی زانیارییەکان بنکەیەک لەناو ناحیەی سنونێ و پێنچ بنکەیش لە دەورووبەری شنگال و دەورووبەی ناحیەی سنونێ چۆڵکراون، بەڵام تا ئێستا ھێزی عێراقی نەچوونەتە ناو ئەو بنکانەوە.

بڕیار بوو ھەفتەی رابردوو دەست بە ئۆپەراسیونێکی ھاوبەشی سوپای عێراق و پۆلیسی فیدراڵ بکرێت، بەڵام ئوپەراسیۆنی پاککردنەوەی شنگال لە چەکدارەکان بۆ ماوەی چەند رۆژێک راگیرا و ئەو چەند رۆژەیش وەک دەرفەتێک بەو ھێز و چەکدارانە دراوە بۆ ئەوەی شنگال چۆل بکەن یا چەکەکانیان دابنێن.

لە ماوەکانی رابردوودا سەرۆکوەزیرانی عێراق، مستەفا کازمی رایگەیاندبوو کە رێککەوتنێکی مێژوویی کراوە کە دەسەڵاتی حکوومەتی فیدراڵ بەپێی دەستوور لەسەر ئاستی کارگێڕی و ئەمنی لە شنگال پتەوتر دەکات.