مێرکڵ: "ئەڵمانیا و تورکیا بەرەنگاریی تیرۆر دەبنەوە"

بەرلین

راوێژکاری ئەڵمانیا، ئانگێلا مێرکڵ رایگەیاند کە ئەڵمانیا و تورکیا بە ھەماھەنگی ھاوبەش بەرەنگاری داعش دەبنەوە.

مێرکڵ و سەرۆکوەزیرانی تورکیا لە بەرلین کۆبوونەوەیەکی رۆژنامەوانی ھاوبەشیان ساز کرد. مێرکڵ لە کۆبوونەوە رۆژنامەوانییەکەدا رایگەیاند: "ھەردوو وڵات جەختیان لەسەر بەرەنگاربوونەوەی تیرۆزم کردووە. ئیتر بە چڕی بەرەنگاری داعش دەبینەوە و بە ھاوبەشی جموجۆڵ دەکەین".

راوێژکاری ئەڵمانیا گوتیشی: "دەستپێکردنی قۆناغی چارەسەری سیاسی بۆ شەڕوپێکدادانەکانی سووریا، پەیامێکی ئۆمێدبەخشە بۆ پەنابەران".

مێرکڵ ئاماژەی بەوەش دا کە لە کۆبوونەوەکاندا بێجگە لە رەوشی عێراق تاوتوێ چالاکییەکانی پەکەکە و بەرەنگاربوونەوە دژی پەکەکە کراوە و راشیگەیاند پێویستە بێ مەرج قۆناغی سیاسی دەست پێ بکات و رەوشی ناوچەکە ئاسایی بێتەوە، بۆ ئەوەی گەنجان بە ئومێدەوە بڕواننە ئایندە.

راوێژکاری ئەڵمانیا لە درێژەدا روونیشی کردەوە کە بە تێر و تەسەل باسی قەیرانی پەنابەران کراوە و جەختی لە پیلانی ئەندامێتی تورکیا لە ئەورووپا کردەوە کە لە ٢٩ی تشرینی دووەمدا تورکیا و یەکێتی ئەورووپا لەسەری رێکەوتبوون.