ئەمریكا ئیدانەی كوشتن و رفاندنی خۆپیشاندەر دەكات لە عێراق

بەغدا ــ AA

باڵیۆزخانەی ئەمریكا لە بەغدا رایگەیاند كە كوشتن و رفاندنی خۆپیشاندەران و هەروەها هەڕەشەكردن بۆسەر ئازادی رادەربڕین لە عێراق ئیدانە دەكات و جەختیش لەوە دەكاتەوە كە بەسەركەوتكردنی ئیرادەی گەلەكەی، عێراق هیچ داهاتوویەكی نابێت.

باڵیۆزخانەی ئەمریكا لە بەغدا راگەیەندراوێكی لەبارەی خۆپیشاندانەكانی عێراق بڵاوكردەوە و تیادا هاتووە: "ئەمریكا بەردەوام جەختی كردووەتەوە لەسەر پاڵپشتیكردن لە ئاسایش و گەشەپێدانی عێراق بۆ ئەوەی بەرگریی بكات لە گەلەكەی دژبەو گرووپە تووندئاژۆیانەی كە هەوڵدەدەن زیان بە سەروەریی و دیموكراتی عێراق بگەیەنن".

لە راگەیەندراوەكەدا ئەوە خراوەتەڕوو كە لە كاتێكدا جیهان چاودێری پێشهات و رووداوەكانی عێراق دەكات، كاتی ئەوە هاتووە حكوومەتی عێراق و سەركردە سیاسییەكان بەپەلە و بە جددی وەڵامی داواكارییەكانی خۆپیشاندەران بدەنەوە، كە داوای چاكسازیی دەكەن و راشیگەیاندووە "بە سەركوتكردنی ئیرادەی گەلەكەی، عێراق هیچ داهاتوویەكی نابێت".

لە كۆتایی راگەیەندراوەكەدا، باڵیۆزخانەی ئەمەریكا لە بەغدا ئاماژەی بەوەكردووە كە ئیدانەی كوشتن و رفاندنی خۆپیشاندەران و هەڕەشەكردن بۆسەر ئازادی رادەبڕین و بەردەوامی توندوتیژی لە عێراق دەكات و جەختی كردووەتەوە لەسەر ئەوەی كە پێویستە عێراقییەكان ئازاد بن و خۆیان بڕیاری تایبەت لە بارەی داهاتووی وڵاتەكەیان بدەن.